14. desember 2011

Stjórn Gildis mótmælir skattlagningu

14.12.2011. Í frumvarpi ríkisstjórnarinnar til breytinga á lögum nr. 129/1997 um skyldutryggingu lífeyrisréttinda og starfsemi lífeyrissjóða, sem lagt hefur verið fram á Alþingi, er gert ráð fyrir að lífeyrissjóðirnir greiði í ríkissjóð sérstakt gjald á árunum 2012 og 2013 sem nemur 0,0814% af hreinni eign til greiðslu lífeyris. Stjórn Gildis hefur sent fjármálaráðherra mótmæli vegna þessarar fyrirhuguðu skattlagningar.

Í bréfi stjórnar Gildis kemur fram að slík skattlagning hafi bein áhrif á réttindi sjóðfélaga í sjóðnum. Hjá Gildi mun þessi skattur nema um 200 milljónum króna á þessu ári sem svarar til um 2,5% af lífeyrisgreiðslum ársins 2011.

Þá vekur stjórn sjóðsins athygli á því að þetta eykur enn það óréttlæti sem er á milli réttinda sjóðfélaga í almennu lífeyrissjóðunum annars vegar og sjóðfélaga í opinberu sjóðunum hins vegar þar sem skattlagning þessi mun aðeins hafa áhrif á réttindi þeirra fyrrnefndu. Er það í hróplegu ósamræmi við yfirlýsingar ríkisstjórnarinnar um jöfnun lífeyrisréttinda á almennum markaði og hjá opinberum starfsmönnum.

Í greinargerð kemur jafnframt fram að frumvarpið sé samið í fjármálaráðuneytinu að höfðu samráði við Landssamtök lífeyrissjóða, Fjármálaeftirlitið og velferðarráðuneytið. Í því sambandi er rétt að taka fram að Landssamtök lífeyrissjóða mótmæltu því eindregið í öllum samskiptum við fjármálaráðuneytið vegna þessa frumvarps að umræddur skattur yrði lagður á lífeyrissjóðina.

Til baka í fréttir